Cari ilin ilk rübü ərzində Bakının daşınmaz əmlak bazarında qiymət artımı davam edib. Bu artım əvvəlki illərdən fərqli olaraq daha xaotik xarakter daşıyır. Belə ki, paytaxtın müxtəlif rayonlarında, hətta eyni rayon daxilində belə qiymət artımı fərqli səviyyədə qeydə alınıb.

Azərbaycan Qiymətləndiricilər Cəmiyyətinin (AQC) sədri Vüqar Orucun sözlərinə görə, bahalaşma xüsusilə yeni tikililərdə daha çox nəzərə çarpır. Statistik göstəricilərə əsasən, 2025-ci ilin ilk üç ayında ilkin mənzil bazarında qiymətlər ötən ilin eyni dövrü ilə müqayisədə 20-25% artıb. Keçən il yeni tikililərdə bir kvadrat metrin orta qiyməti 1 800 manat olduğu halda, bu il bu rəqəm 2 200-2 300 manat arasında dəyişir.

Vüqar Oruc bildirir ki, tikinti şirkətləri qiymətləri artıq təkcə bazar təhlilinə əsaslanaraq müəyyən etmirlər. Onlar həmçinin artan tikinti xərcləri, beynəlxalq inflyasiya meylləri və manatın alıcılıq qabiliyyətində baş verən dəyişiklikləri də nəzərə alırlar.

Bahalaşma əsasən yeni tikililərdə özünü göstərsə də, istismar müddətini başa vurmuş binalarda bu artım daha zəif hiss olunur. Ekspertlər bunu həmin binaların gələcəkdə sökülmə ehtimalı ilə izah edirlər. Baş plan çərçivəsində nəzərdə tutulan söküntülər səbəbindən belə mənzillərin bazar dəyəri sabit qalır və ya çox az dəyişir.

Ümumilikdə isə 2025-ci ilin ilk rübü daşınmaz əmlak bazarında qeyri-sabit, lakin artan qiymət dinamikası ilə yadda qalıb.